Rahul Gandhi-a'n Great Nicobar Project dodal

Congress party hruaitu, Lok Sabha-a Leader of Opposition, Rahul Gandhi chuan sorkar laipuiin Andaman and Nicobar-a Great Nicobar project, Rs vbc 90,000 man mega infrastructure project a kalpui chu na takin a sawisel a, hei hi ram leilung bakah tribal heritage tana thil pawi tak a ni, a ti.

Rahul Gandhi hian Great Nicobar Island hi a tlawh a, nimin khan tualchhung mite a hmu a ni. Sorkar laipui project siam chu thil tihchhiatna lian tham tak tur a nih thu a sawi a, "Sorkar chuan project tiin a sawi a, mahse, project ka hmu lo. Thingkung nuai tel kih tura tih niin, rainforest square km 160-a zau chu a chhe dawn a ni. A mi chengte ngaihthah an ni a, an inte laksak an ni bawk," tiin a sawi. Ram hnuaia thingkungte chu kum upa tak tak an ni a, a mi chengte tan hriatrengna tam tak an kengtel tih a sawi. He project hi ram ngaw tihchereuna, ecology lama hlohna nasa tak thlentu a ni dawn tih sawiin, hei hi hmasawnna a nih lo tih a sawi. Sorkar thiltih chu India ram leilung leh tribal heritage tana thil pawi leh inbumna lian ber nia a ngaih thu a sawi a, sorkar chu a thiltih hi titawp turin a ngen bawk. He ruahmanna hi Sonia Gandhi pawhin a hmain na takin a lo sawisel tawh a, sorkar chu a thutlukna siam ngaihtuah ṭha leh turin a ngen.

Sorkar laipui chuan Andaman and Nicobar chhim tawpa mega project siam chu ram venhimna leh security lam atan a pawimawh tih a sawi thung. Mega project hnuaiah hian ram square km 130-a zau ram ngaw chu ṭhiatin international transshipment terminal,township, power plant leh greenfield airport siam a tum a ni.

Gandhi chuan tualchhung mite nena an inkawmnaah project thawh tur chu an vaiin an duh lo vek tih an sawi a, sorkar chuan project chungchang engmah a sawipui lo a, an ram an laksak turah zangnadawmna eng ang nge an pek dawn tih pawh an hre lo tih a tarlang bawk.