Mumbai-ah cocaine Rs vbc 1,745 hu man

Narcotics Control Bureau (NCB) chuan Mumbai-ah international narcotics ring lian dap chhuakin high-grade cocaine kg 349 an man a, an ruihhlo man hi international market-ah Rs vbc 1,745 man a ni.

NCB-in ruihhlo tam tham tak an man thu hi union home minister Amit Shah chuan nimin khan social media lamah a tarlang a ni. NCB chuan ruihhlo tawlhna lian tak man chhuak tur hian theihtawp an chhuah thu sawiin,an hlawhtlinna avanga a lawmpui thu a sawi bawk. Shah chuan ruihhlo tawlhtute laka beihpui thlak a, man an nih zel tur thu a sawi bawk.

India-in man tuma a zawn, ruihhlo tawlhrutu Mohammed Salim Dola chu Turkey aṭangin India-ah rawn thawn a ni bawk. NCB hian Salim Dola man tum hian international leh Indian intelligence agency-te nena thawk hoin 'Operation Global-Hunt' an nei a ni. India ngenna angin a lakah kum 2024 March thla khan Interpol Red Notice tihchhuah a ni a, Turkey intelligence agency ten April 25 khan an man a ni. April 28 khan Turkey aṭangin India-ah rawn thawn a ni a, New Delhi-a IGI Airport a rawn thlen rualin NCB hian an lo la nghal a ni. April 29 khan court-ah hruai a ni a, May 8 thleng NCB kuta awm tura tih a ni.

Dola hi gangster lar leh drug lord, Dawood Ibrahim nen pawha inzawmna ṭha tak nei nia sawi a ni a, ruihhlo tawlhruk kaihhnawihah Maharashtra leh Gujarat-ah thubuai eng emaw zat a nei a ni. Kum 2025 khan a fapa, Tahil Salim Doha leh a thawhpui dangte chu Mumbai police-ten an lo man tawh bawk.