Vietnam President To Lam-a'n India rawn tlawh dawn

India leh Vietnam inlaichinna tihchak nan leh ralkhel thila thawh dunna thar siam turin, Vietnam President thar To Lam chuan kar thar khian ni thum chhung cham turin India a rawn tlawh dawn tih External Affairs Ministry chuan a puang. To Lam hian kumin April thlaa Vietnam President atana lak luh a nih hnua ram pawn a tlawhna hmasa ber a ni ang.

President To Lam hian India a rawn tlawh chhan ber chu ram pahnih inkara 'Comprehensive Strategic Partnership' kum 10 tlinna puala thawh dunna thuk zawk siam a ni. Prime minister Narendra Modi nen pawh an lo inhmu fo tawh a, ralthuam siam chungchang, sumdawnna, leh 'critical technology' thar ber ber chungchangah inremna thar siam an tum a ni.

India a rawn tlawh chhung hian South China Sea-a China-in sipaite a chelek avanga ralkhelna a thlen chungchang leh tuipui lama venhimna chungchangte an sawi dawn a, lawngchhia leh tuihnuai lawng chhan chhuah kawnga thawh dunna thuthlung an ziak thar dawn bawk. May 6 hian Rashtrapati Bhavan-ah President Droupadi Murmu chuan president Lam lawmna hun a buatsaih ang.

President Lam hi Vietnam sorkar mi pawimawh leh sumdawng hruaitu lian tak takten an rawn zui dawn a; India nena insumdawn tawnna daltu awmte chinfel dan tur leh, khawvel hriatpuia tuipui lamah daltu awm loa thawh dun dan tur chungchangte pawh chipchiar taka sawi ho tura ruahman a ni.