Bihar-ah NRC kalpui a ni dawn lo : Nitish Kumar

National Democratic Alliance (NDA) hnuaia BJP thawhpui party lian, Janata Dal (United) party hotu leh Bihar chief minister Nitish Kumar chuan an state-ah National Register of Citizens (NRC) kalpui a ni dawn lo tih a sawi. 

BJP president leh union home minister Amit Shah chuan India ram pumah NRC hi kalpui a nih tur thu a lo sawi tawh a, hei hi mi tam takin an sawisel a ni. 

JD(U) hian Parliament-a Citizenship Amendment Bill thlawp mah se NRC erawh kalpui a duh lo thung. Hemi hma hian CAB thlawptu, Odisha chief minister leh Biju Janata Dal hotu Naveen Patnaik pawhin an party chuan NRC chu an thlawp dawn lo tih a lo sawi tawh bawk. 

JDU vice president Prashant Kishor leh national general secretary Pavan Varma chuan Parliament-a CAB thlawp lama an party in vote a thlak chu pawi a tih thu a lo sawi tawh a, Nitish Kumar hnenah pawh banna a thehluh phah hial. Mahse a banna hi pawmsak a ni lo.  Kishor chuan Nitish Kumar hi hmuin, CAA leh NRC kal dun pui an nih a, a ṭhat loh theih dante a sawipui zui a ni. Hemi hnu hian Bihar CM pawhin NRC an hman ve dawn loh thu hi nimin khan a tichiang a, Bihar-a NRC kalpui a ngaihna chhan a hriat loh thu a sawi.  NDA rorelna state zingah Bihar hi NRC dodaltu hmasa ber a ni. 

Sorkar laipuiin kalpui a tum, NRC hi West Bengal chief minister Mamata Banerjee, Punjab CM Amarinder Singh, Kerala CM Pinaryahi Vijayan te pawhin an state-ah an hman ve dawn loh thu an sawi tawh. Anni bakah hian Congress sorkarna -  Rajasthan, Madhya Pradesh leh Chhatisgarh chief minister-te pawhin CAA-NRC hi an pawm loh thu an lo sawi tawh bawk a ni.