Kerala-ah Congress kaihhruai UDF an sorkar dawn

Kerala Legislative Assembly inthlan neih zawh takah kum 50 dawn Left party rorelna tihtawp a ni a, Congress kaihhruai, United Democratic Front (UDF) chuan seat 140 awmah seat 97 lain sorkar thar an siam dawn.

Chief minister Pinarayi Vijayan kaihhruai Left party sorkar hneh a nih tak avangin India ramah Left party sorkarna state a awm dawn ta lo. Hetih lai hian Congress party chaun chhim lam state pathumah sorkarna an siam dawn ta thung. Congress hian Karnataka leh Telangana-ah sorkarna an siam mek a ni. Communist Party of India (Marxist) kaihhruai Left Democratic Front (LDF) hian seat 35 an la a, NDA-in seat 3 an la ve bawk.

Nimin khan CM Vijayan chuan govenor Rajendra Vishwanath hnenah banna a theh lut a, sorkar thar lak luh a nih hma chu cartaker CM hna a chelh rih dawn a ni.

Kerala chief minister tur hi tihfel a la ni lo a, CM atana sawi lan zingah Congress national general secretary KC Venugopal, state assembly-a leader of opposition ni mek VD Satheesan leh state unit chief hlui, Ramesh Chennithala te an tel. Congress High Command chuan CM thar tur hi a thlang dawn a ni. CM tur thlan fel hunah sorkar thar lak luh hun tur pawh tihchian a ni ang.