Tamil Nadu CM Stalin-a'n banna theh lut

Tamil Nadu assembly inthlanah rorellai, Dravida Munnetra Kazhagam (DMK) an chak zawh loh avangin chief minister M.K Stalin chuan governor Rajendra Vishwanath Arlekar hnenah banna a theh lut. Govenor chuan Stalin hi sorkar thar lak luh a nih hma chu interim CM a awm chhunzawm turin a ngen.

2026 Tamil Nadu Legislative Assembly inthlan neih zawh takah lemchan thiam, politics-a zuang lut, Vijay-a party Tamizhaga Vettri Kazhagam (TVK) chu party mala seat la hnem ber niin, seat 234 awmah seat 108 an la a ni. Mahse, sorkarna siam tura seat ngai zat, 118 an phak loh avangin party dang nen thawk dunin ṭangrual sorkar an siam a ngai dawn a ni. Sorkarna siam tura seat 5 la tu bakah party tenau dangte an sawm dawn nia sawi a awm a, mahse inbiakna erawh an la nei lo. TVK vote share hi 34.92% a tling pha a ni. Rorellai DMK chuan seat 73 lain, AIADMK chuan seat 53 an la ve bawk.

Stalin hi kum 2021 aṭang khan Tamil Nadu CM niin, India rama regional party upa ber, DMK president dinhmun hi kum 2018 aṭang khan a chelh bawk. Tun ṭum inthlanah Kolathur bialah TVK candidate, VS Babu chu vote 8,795 in a hneh zo lo. He bialah hian kum 2011 aṭang khan Stalin hi thlan tlin a lo ni chho char char a ni. A hneh zawh tak loh, TVK candidate Babu hi kum 75 mi niin, thiamna lamah pawh Class 8 thleng chauh zir a ni.