Centre-in hnathawktu a thlawna inentirna tur scheme tlangzarh

Union labour and employment minister Mansukh Mandaviya chuan Ningani khan Labour Codes thar hnuaia ram chhunga hnathawktu, kum 40 chunglam tana kumtina a thlawna hriselna inentirna tur scheme thar a tlangzarh. He scheme thar hi ram chhunga hnathawktute hriselna leh himna atana lungphum pawimawh tak a nih thu a sawi.

New Delhi-a ESIC Basai Darapur-a tlangzarhna hun hmanah Mandaviya chuan sorkar thil tum ber chu hnathawktute tana "social security coverage" tihphuisui a nih thu a tarlang. Tun hnaiah social security hnuaia inziaklut hi nuai 30 aṭangin nuai 94-ah an kai chho tawh a, Employees State Insurance Corporation (ESIC) hnuaia hamṭhatna dawngtu pawh vbc 7 aṭangin vbc 15-ah an pung tawh tih a sawi bawk.

Union minister chuan he inentirna thar hmanga natna hriat chhuah hma chu a pawimawh thu sawiin, camp-a hmuh chhuah natna hrang hrang enkawlna leh damdawite chu ESIC facility-ah a thlawna pek vek an nih tur thu a sawi. Hei hian hnathawktute tan sum leh pai hautak lova hriselna kawnga venhimna lian tak a thlen a beiseiawm hle a ni.

Labour Codes thar chungchang sawi bawkin, minister chuan mipa leh hmeichhia inkara hlawh inthlauhna tihbo a nih tawh thu leh, hmeichhia nau nei turte chawlh (maternity leave) pawh kar 12 aṭangin kar 26-ah tihsan a nih tawh thu a tarlang. Tun hnaia "gig workers" an tih maite pawh he scheme-ah hian telh vek an nih thu a tarlang bawk.