West Bengal-ah sorkar laipui scheme-te chhunzawm dawn

Sorkar laipui chuan West Bengal-a hna thawh loh leh khaihlaka awm reng tawh flagship scheme hrang hrangte chu chhunzawm leh tura hma lak a nih thu Ministry of Panchayati Raj officer-te chuan an sawi. Sorkar laipui leh West Bengal sorkar inkarah thawk ho thei loa inrin lohna awm ṭhinte sutkian a nih tawh vanga kalpui leh thei tur a nih thu an tarlang.

West Bengal-ah hian Trinamool Congress (TMC) in kum 15 chhung sorkarna an siam hnuah, state assembly inthlan neih zawh takah BJP chuan TMC hi hnehin, a vawi khatna atan Bengal-ah BJP sorkar a ding dawn a ni.

Sorkar laipui tarlan danin, MGNREGS, Ayushman Bharat (health scheme), leh Panchayati Raj hnuaia hmasawnna hna hrang hrang, a hmaa Mamata Banerjee kaihhruai TMC sorkarin a lo dan chah tawhte chu tunah hian chak taka kalpui leh tura ruahman a ni. Hetiang scheme hi Bengal sorkar hmasain sorkar laipui 'branding' chungchang leh inkaihhruaina khauh tak takte vangin a lo hnawl fo a ni. A bik takin loneitute tana sorkar laipui scheme pawimawh PM-KISAN, village property survey (SVAMITVA scheme) leh panchayat dinhmun a endikna turte chu tun hmaa data thawn duh loh avangin a tawp vek a ni. Sorkar thar a din dawn tak avangin sorkar laipui scheme hrang hrangte chu West Bengal-ah hian hman theih tura chhawp chhuah leh vek a ni dawn tih an tarlang.