MGNREGA hnathawkte'n May 15-ah nawrh huaihawt dawn

Mahatma Gandhi National Rural Employment Guarantee Act (MGNREGA) hnuaia inhlawhfa ṭhinte chuan sorkar laipuiin he scheme titawp tura thutlukna a siam duh lohna lantir nan, May 15 Zirtawpni hian ram pum huap nawrh an huaihawt dawn. Thawhlehni khan sorkar laipui chuan Act hi July 1, 2026-ah tihtawp a nih tur thu hriattirna a lo chhuah tawh a ni.

NREGA Sangharsh Morcha leh All India Kisan Sabha (AIKS) te chuan he scheme titawp tura sorkar hmalakna hi an dem a, loneitu rethei, hmeithai leh thingtlanga ṭhalaite tana eizawnna pakhat leh dan hnuaia inhlawhna (legal guarantee of employment) an neih chhun ṭhiah a ni tur hi an pawm thei lo tih an sawi. AIKS chuan sorkarin budget a tihhniam sak bakah, hlawh pek chhuah kawngah harsatna an siam reng niin an puh bawk.

Nawrh huaihawtte hian sorkarah demand hrang hrang an siam a, chung zingah chuan MGNREGA thlakna tur VB-G RAM(G) Act hnuhdawh, kum khata hna thawh tur ni 100 aṭanga ni 200-a tihpun, ni khat hlawh chu a tlem berah Rs 700-a tihpun te a tel. Hlawh hi thil man sang zel mila dah an phut a ni.

Hnathawkte chuan tun hnaia sorkarin attendance lak nan 'facial recognition' leh khawl thar exclusionary technology a hmante pawh titawp turin an phut. Heng hmasawnna tharte hian harsa zawka nung thingtlang mite tan inhlawhna kawng a tiharsa zawk niin an tarlang.