India leh Oman FTA June 1-ah hman ṭan tum a ni

India leh Oman sorkarin ram pahnih inkara sumdawnna tihhmasawnna tura an lo din tawh, Comprehensive Economic Partnership Agreement (CEPA) chu kumin June 1 aṭanga hman ṭan tum a nih thu commerce minister Piyush Goyal chuan a tarlang. He inremna hi nikum December 18 khan ziahfel tawh niin, tunah hian a taka hman ṭan a ni thei dawn ta a ni.

Goyal chuan Thawhlehni khan Oman negotiating team-te nena an inbiakna an neih hnuin he thu hi a sawi a, sumdawnna kawngah ram pahnihte tan hmasawnna nasa tak a thlen a beisei thu a sawi bawk. He inremna hnuaiah hian India aṭanga Oman-a bungrua thawn chhuah tam tak chu chhiah (duty) ngai loa thawn theih a ni tawh dawn bawk.

Oman nena inbiakna a hlawhtlin lai hian, India leh Chile inremna tur erawh harsatna eng emaw a la awm thung. Goyal chuan ram pahnihte economy dinhmun inan loh avanga harsatna awm chu 'innovative solution' hmanga chinfel tura beih mek a ni tih a sawi. Chile hnen aṭanga mineral leh thil pawimawh dangte lak luh kawngah India-in duh thlan tur ṭha a hmu a nih chuan, inbiakna chu zawhfel thuai theih a nih thu a tarlang.

Tun hnai hian India chuan ram hrang hrang nena sumdawnna lama inremna (FTA) ziah a ngaipawimawh thar hle. Oman nena an inremna hian Middle East-a India sumdawnna a tihphuisui hle beisei a ni.