BRICS Foreign Minister Summit ṭan a ni

New Delhi-ah nimin khan BRICS Foreign Ministers’ Summit ṭan a ni. External affairs minister S. Jaishankar chuan summit hawnnaah thu sawiin, tun dinhmuna West Asia-a thil thleng mek leh indona chuan ngaihtuahna a tibuaiin, ngaihven bik a ngai hle tih a sawi. He inkhawm hi Bharat Mandapam-ah neih a ni a, BRICS member ram hrang hrang leh partner ram aṭanga palai an tel a, vawiinah neih chhunzawm a ni ang.

EAM chuan khawvel pumah ram leh ram inkarah buaina leh inrem lohna a tam tih sawiin, maritime traffic-ah leh energy infrastructure-ah harsatna a thlen nasat thu a tarlang. "Strait of Hormuz leh Red Sea-te hi khawvel economy tan kawng pawimawh tak an nih avangin, him taka thil thiar luh leh chhuah hi a pawimawh hle a ni," a ti. West Asia-a buainain khawvel pum sumdawnna a nghawng nasat thu a sawi bawk.

Gaza Strip-a thil thleng mek chungchang pawh sawiin, chhawmdawlna thawhna kawnga harsatna thleng mek chu pawi a tih thu a sawi a, India chuan 'two-state solution' a thlawp tlat thu leh, Palestine buaina chu inbiakna hmanga chinfel a nih theih nan inkahhaina nghet tak neih a pawimawh thu a tarlang. Palaite inbiakna aia hrekna hman fo hi India chuan a thlawp lo tih a sawi nawn bawk a ni.

India-in BRICS chairmanship a chelh mek a, meeting 80 chuang zet neih a ni tawh. Member tharte nena thawh hona ṭha neih a pawimawh thu leh, climate change, supply chain, leh technology thar hrang hrangte chu mipuite tan a ṭha zawnga hman a nih theih nan member ramte ṭang rual turin a sawm bawk.