Kerala CM atan V.D. Satheesan ruat a ni

Kerala Assembly inthlan neih zawh takah Congress kaihhruai United Democratic Front (UDF) chuan hnehna changin, chief minister thar tur chu nimin khan tihfel a ni ta. Congress High Command chuan hming langsar pahnih K.C. Venugopal leh Ramesh Chennithala-te aiin, mipuite duh rawn V.D. Satheesan chu Kerala Chief Minister thar atan an thlang.

V.D. Satheesan hi kum 61 mi niin, vawi ruk zet MLA a ni tawh a, cabinet minister la ni ngai lo mah se, Assembly-ah Leader of Opposition (LoP) hna a lo chelh tawh a ni. High Command thutlukna an puan hnuah Satheesan chuan, "He dinhmun ka thleng thei hi UDF hnuaia thawk ṭhahnemngai tak tak leh Congress worker-te vang a ni," tiin a sawi. Tun ṭum inthlanah khan North Paravur constituency aṭangin thlan tlin a ni.

Kumina Kerala Assembly inthlanah hian UDF chuan seat 140 awmah seat 102 la in, Pinarayi Vijayan-a kaihhruai LDF (Left Democratic Front) chu an hneh a ni. LDF lam hian kum thum a zawna hnehna chan tum mah se, mipuiin Congress an thlang ta zawk a ni.

CM thar tur V.D. Satheesan hi ukil a ni a, zirlai pawl Kerala Students Union (KSU) aṭanga inhmang ṭanin kum 25 zet MLA a ni tawh. A kaihhruaina hnuaiah hian Kerala mipui pawhin beiseina sang tak an nei mek bawk. Congress party tan pawh state dangah inthlan a hnaih leh tawh avangin, Kerala-a an hnehna chan hi an tan phurna thar petu a nih a rinawm.