Ram danpui dinhmun derthawngah a ding: Yashwant Sinha

BJP hruaitu hlun ṭhin leh Union finance minister hlui, Yashwant Sinha chuan Republic Day-a thu a sawinaah India ram danpui chu din­hmun derthawngah a ding tih a sawi.

Km 3000 kal tura Gandhi Peace March nei mek, Yashwant Sinha hian Republic Day khan Uttar Pradesh thlengin Etawah-ah Samajwadi Party chief Akhilesh Yadav nen India hnam puanzar, ft 158-a sang chu an pawtpharh dun a ni.

Thu a sawinaah Sinha chuan, sakhuana zawnga ram ṭhenhran tum mek a nih avangin India ram danpui chu dinhmun derthawngah a ding a ni, a ti.

"Muanna, tharum thawh lohna thuchah kengdarh turin kan chhuak a ni. He Yatra kalpui tura thutlukna hi kan ram danpui dinhmun hlauhtawnawma a din vangin kan siam a ni. Loneitute an lawm lo a, hmun hrang hrangah dodalna a nasa hle bawk," tiin a sawi. 

Samajwadi Party chief Akhilesh Yadav pawhin mipui zingah inhuatna a pung nasa hle a, chu chu enfiah a  ngai a ni. Democracy-ah chuan mi zawng zawng hi ngaihthlak kan ni tur a ni. Mipui an lawm lo a nih chuan sorkar chuan a ngaithla tur a ni, a ti bawk. 

"Mi pakhat Mahatma, Gujarat aṭanga bul ṭan leh Yamuna lui kuanga a thaw tawp thlenga hun hmang a awm. Hemi hnuah pawl pakhat an lo awm leh a, chung mite chu Gujarat aṭanga lo kal tho, Yamuna lui kuanga inbeng­bel mek an ni. Mahse chung mite chuan ram ṭhendarh an duh a ni," tiin prime minister Narendra Modi leh a kaihhruaite chungchang a sawi.

Yashwant Sinha hian January 9 aṭang khan peace march hi a ṭan a, Mumbai aṭanga bul ṭanin Rajasthan leh Haryana a kal zo tawh a, UP-ah bul a ṭan leh mek a ni. January 30 hian Delhi-a Rajghat-ah a peace march tawpna hi a siam ang.