PM Modi UAE-ah zin

Prime minister Narendra Modi chu nimin Zirtawpni khan UAE-ah thlengin, UAE president Sheikh Mohammed bin Zayed Al Nahyan nen inbiakna an nei. West Asia indona avanga an ram beih tel ve a ni chu a dem thu leh, remna leh muanna a thlen theihna turin India chuan puih a inhuam thu a hrih.

Ram pahnih hruiatute hian defence lama thawh dunna, petroleum reserve leh LPG supply chungchangah inremna an siam a, inbiakna an neihah hian energy security chu ngaih pawimawh a nih thu an sawi. Energy sector-ah India leh UAE chuan Strategic Petroleum Reserves chungchangah inremna thuthlung ziakin, he inremna hian India-in hun rei tak energy security leh supply diversification ruahmanna a siamte a tichak dawn a ni.

Hei bakah India leh UAE chuan Gujarat-a Vadinar-a lawng siamṭhatna atana thawh dunna tur MoU an ziak bawk a, hei hian ram pahnihte maritime infrastructure, logistics leh industry lama an thawh dunna a tihchak beisei a ni. Economy lama hmalaknaah UAE chuan India infrastructure project atan USD tld 5 a invest thu leh, RBL Bank leh Samman Capital-ah investment a neih tur thu a puang bawk.

PM Modi hian UAE hi ram panga a tlawh tur zinga a tlawh hmasak ber niin; Netherlands, Sweden, Norway leh Italy-te a tlawh leh dawn a ni. UAE-ah hian Prime Minister hi an President-in lo hmuakin guard of honour hlan a ni.