Sardar Vallabhbhai Patel piancham lawm

Gujarat-a Kevadiya khuaa Statue of Unity-ah nimin khan 'Iron Man of India' tia sawi, Sardar Vallabhbhai Patel paincham vawi 144-na chu prime minister Narendra Modi hoin an lawm.  

PM Modi hian 'Ekta Diwas Parade' a hman pui bawk a, Patel-a piancham October 31 hi kum 2014 aṭang khan, National Unity Day (Ekta Diwas) atan hman a ni. Patel piancham hi union home minister Amit Shah chuan New Delhi lamah a hmanpui ve bawk.

"British chuan India mipuite ṭhendarh tumin hma an la a ni. Chanakya hnua India mipuite min tipumkhat leh theitu chu, Sardar Vallabhbhai Patel hi a ni. India ramah hian mi chi hrang hrang cheng mah ila, India nihnain kan inpumkhat vek a, chu chu kan thil tihtheihna leh kan nihna chu a ni a, chakna thuruk chu inpumkhatna hi a ni," tiin kalkawmte hmaah PM chuan a sawi. 

Patel piancham pual hian mipuite tan 'Run For Unity' buatsaih ṭhin a ni. Modi hian Article 370 chungchang pawh sawi langin, "Firfiakte laka kan him theihna tur chuan he thil hi kan tih a ngai a ni," a ti. "Firfiakte hian pawisawilo nunna sang tel tak meuh an la tawh a, Article 370 kan tihtawp avang hian firfiakte chetna tur kulh bang sang tak kan siam tihna a ni," tiin PM Modi chuan a sawi bawk.  

Nikum October 31-a PM Modi-a hawn, Sardar Vallabhbhai Patel hriatrengna lim an siam 'Statue of Unity' hi feet 597 (182 metres) a sang niin, khawvela statue sang ber a ni.