India leh Netherland-in 'Strategic partnership' inremna ziak

India leh Netherlands chuan khawvel geopolitics danglam chho zel karah ram pahnih inlaichinna tihchakna turin an thawh dunna chu 'Strategic Partnership' ah Inrinni liam ta khan hlankai a nih thu an puang. Thawh dunna thar hi prime minister Narendra Modi leh Netherlands prime minister Rob Jetten te The Hague khawpuia an inbiak hnuah thutlukna hi siam a ni.

Modi chuan PM Jetten bakah Netherland ram hruaitu dangte kawmin, Dutch CEO lian tak takte nen pawh sumdawnna chungchang an sawi ho bawk. PM Modi chuan "Siam thar leh tihhmasawnna kawngah ram pahnih hian kum sawm kalta chhung khan hmalakna lian tak kan lo nei tawh a ni," a ti. Ram pahnihte hian thawh dunna tihchakna turin huang hrang hrangah inremna an ziak. Green Hydrogen siam chhuah chu chak zawka kalpui an tum a, venhimna lam bungrua pawh India rama siam chhuah dun (joint manufacturing) a nih theih nan ruahmanna an siam bawk.

Dutch sorkar nen hian tui enkawlna, hriselna leh zirna kawngah thawh dunna ṭha tak an neih tawh thu tarlangin, PM Modi chuan hmasawnna nawr kaltu tur atan 'Speed and Skill' hmanga hma lak a duh thu a sawi. Hei bakah hian sorkar laipuiin 'Ease of Doing Business' tihṭhat nan tax leh labour code-ah te nasa takin siamremna neih a ṭul thu a sawi bakah, semiconductor, AI leh renewable energy sector-ahte India-a investment ti turin Dutch sorkar a sawm.

Netherlands hi Europe rama India-in sumdawn lama a thawhpui lian ber zinga mi a ni. Kum 2024-25 chhung khan an insumdawn tawnna hlutna hi USD tld 27.8 zet a tling pha a ni.