NIA-in Coimbatore-ah ISIS zawng

National Investigation Agency (NIA) chuan Coimbatore, Tamil Nadu-ah Islamic State-ten bu an khuar nia an hriat vangin zawn hna beihpui an thlak.

PTI chuan nimin khan Coimbatore ISIS awm nia rinhleh kaihhnawihah hian mi pahnih in leh a vel an dap tih tarlangin, GM Nagar-a Nissar leh Lorrypet-a Sauridin-ahte NIA hian beihpui an thlak tih police-te pawhin an sawi. 

NIA hian tun hnai thla eng emaw zat chhung chu Coimbatore-ah hian beihpui an thlak tawh a, IS member paruk an man tawh a ni. IS hian India chhim lama Rashtriya Swayamsevak Sangh (RSS) leh BJP hruaitute an bitum nia sawi a ni bawk. 

Sri Lanka-a inkhuar Islamic thuhriltu Maulvi Zahran bin Hashim chuan pawikhawihna lian tham thlen a tum nia sawi a nih avangin nikum September thla khan man a ni a, thu an zawhfiahna aṭangin Coimbatore-ah hian IS hian bu an khuar ṭan tih hi hriatchhuak a ni. 

Coimbatore-a IS zawn hna beihpui thlaknaah hian nikum December khan NIA hian National Thowheed Jama’at (NTJ) leader Hashim-a video an hmuchhuak tawh bawk. He video-ah hian Hashim hian Sri Lanka, Tamil Nadu leh Kerala-a Muslim ṭhalaite chu Islam rorelna din turin a fuih niin video entute chuan an sawi a ni.