PM Modi hnenah Sweden chawimawina sang hlan

Sweden ram tlawha zin mek, prime minister Narendra Modi chu Pathianni khan Sweden sorkarin an ram chawimawina sang ber, 'Royal Order of the Polar Star, Degree Commander Grand Cross' a hlan. He chawimawina hi Sweden sorkarin ram pawnlam hruaitu (Head of Government) hnena an hnathawh ṭhat vang leh, Sweden nena inlaichinna chak leh ṭha an siam avanga chawimawina an pek ṭhin a ni.

PM Modi hian ram dang aṭanga chawimawina a dawn 31-na a nih bakah, Asia ram hruaitu zingah Sweden sorkar aṭanga chawimawina dawng thei hmasa ber a ni bawk. He chawimawina hi Crown Princess Victoria chuan Gothenburg khawpuiah a hlan a, India leh Sweden inlaichinna tihchak nana a thawhhlawkna leh hruaitu a nihna rintlak tak hriatpui nan he chawimawina hi hlan a nih thu Ministry of External Affairs chuan an tarlang.

Modi chuan Pathianni khan Sweden rama Gothenburg khawpuiah European Round Table for Industry (ERT) member-te kawmin, India rama hmasawnna hrang hrang lian tham thawh mek, green hydrogen mission leh clean energy-ah te Swedish company-te chu tel ve turin a sawm. India ram chu tun hnaiah reforms, performance leh transformation mantra zuiin chak takin a kal mek tih a tarlang bawk.

Kum 1921-a Rabindranath Tagore-a'n Sweden ram a tlawh aṭanga kum 100 tlinna (Centenary) lawmna pualin PM Modi leh Sweden prime minister Ulf Kristersson te chuan thilpek an inhlan tawn a ni. PM Modi leh Sweden Prime Minister chuan ram hmasawnna hrang hrang an sawidun nghal.

PM Modi-an Norway thleng

PM Modi chuan ni hnih chhung Sweeden-a hun a hman hnuah nimin khan ni hnih cham turin Norway a thleng. Prime Minister hi airport-ah Norway prime minister Jonas Gahr Store leh hotu dangten an lo hmuak a, kum 43 hnua India prime minister Norway tlawh leh hmasa ber a ni.

Norway-a a cham chhungin PM Modi hian King Harald V leh Queen Sonja te pawh a hmu dawn a, a thlengtu PM Store nen pawh ram pahnih hmasawnna tura thawh dunna kawng hrang hrang, sumdawnna, technology lam leh thil dang pawimawh tam tak an sawi dun dawn tih Ministry of External Affairs chuan an tarlang.