Kerala UDF sorkar tharin kum upa pualin department siam

Kerala-a Congress party kaihhruai, United Democratic Front (UDF) sorkar thar chuan lak luh an nih hnu lawkah kum upa pualin department a siam nghal a, India ram chhunga hetiang department siam hmasa ber state an ni.

Thawhṭanni khan Congress hruaitu, V.D. Satheesan chu Kerala chief minister atan lak luh a ni a, kum 10 hnua UDF-in sorkarna a chan lehna a ni. CM rual hian council of minister 20 te lak luh an ni bawk a, an zinga 14 chu minister an nih vawi khatna a ni. Sorkar thar lak luh inkhawm hi Congress president Mallikarjun Kharge bakah Rahul Gandhi leh Priyanka Gandhi ten an hmanpui a, Congress sorkarna state-a party hruaitu eng emaw zat an tel bawk.

Lak luh an nih hnu lawkah CM Satheesan kaihhruaiin state secretariat-ah cabinet meeting hmasa ber neih nghal a ni a, inthlan dawna an manifesto-a an tarlan, Indira Guanantee scheme panga zinga pahnih chu kalpui nghal turin an rel. Scheme kalpui nghal tura an relte hi June 15 aṭanga KSRTC bus-a hmeichhiate a thlaawna an chuanna tur leh, kum upa pual bika department siamte an ni. Kerala hi kum upa puala department siam hmasa ber a nih bakah, India ram chhunga state zingah a thlawna hmeichhiate tana bus chuan theihna tur scheme siam pakuana a ni . Meeting-ah hian Asha worker-te lawmman chu Rs 9,000 aṭangin Rs 12,000 a tihpun an remti bawk a ni.

Kerala hi state mipui aṭanga teha kum upa tamna ber niin, an state bikah mihring dam chen hi chawhrualin kum 75 a tling. CM chuan Japan-in kum upa zawkte a enkawl dante chu thla hnih chhungin an zirchiang dawn tih a sawi a, "Society chu kum upa zawkte an enkawl danah kan teh ṭhin. Kerala chu kum upate duat leh enkawl ṭhat kawngah model state kan ni dawn a ni," a ti.

State assembly inthlan neihah UDF hian seat 140 awm aṭangin seat 102 a la pha a ni. Congress chu party mala seat la hnem ber niin seat 63 a la a, a thawhpui Indian Union Muslim League (IUML) chuan seat 22 a la ve bawk. Kum 10 chhung sorkarna lo siam tawh, Left Demoncratic Front (LDF) chuan seat 35 chauh a la pha thung a, BJP-in seat 3 an la ve bawk.