Delhi Chief Minister leh a minister parukte la lut

Aam Aadmi Party (AAP) hruaitu Arvind Kejriwal chu nimin khan Delhi Chief Minister atan rinawmna thu tiamtira lakluh a ni ta. A rual hian a cabinet minister parukte pawh lakluh nghal an ni bawk. 

Kum 51 mi, Arvind Kejriwal hi Delhi CM atan lakluh a nih ṭum thumna a ni. 

Nimina CM lakluh inkhawm hi Ramlila Maidan-ah neih a ni a, mipui tel an ṭhahnem hle. Kejriwal chuan he hun hmanpui turin prime minister Narendra Modi pawh a lo sawm tawh a, mahse PM hian nimin khan a bial, Varanasi-ah programme a neih avangin a telpui lo a ni. 

Lakluh a nih hnua thu a sawiah Delhi CM chuan, "Tunah chuan inthlan a zo tawh. Tupawh lo vote ula, tunah chuan chhungkaw khat vek kan ni tawh a ni," tiin, inthlan campaign laia an khingpuiten an beihna hrang hrangte chu a ngaidam vek tawh tih a sawi. 'Delhi fapa' tia inkoin, inthlana an party in hnehna an chan chu a mimal hnehna ni loin, Delhi mipui tinte tana hnehna a ni, a ti. Delhi mipuite chu a chhungkua an ni tiin, Delhi hmasawnna leh cheimawina tura theithawp an chhuah a ṭul thu a sawi bawk. 

CM lakluh rual hian cabinet minister atan mi paruk - Manish Sisodia, Satyendar Jain, Gopal Rai, Kailash Gehlot, Imran Hussain leh Rajendra Pal Gautam-te chu lakluh nghal an ni. 

Delhi Assembly seat 70 awmah AAP hian seat 62 lain, BJP in seat riat a la a ni.