June 18-ah Rajya Sabha seat 24-ah inthlan nei dawn

Election Commission of India (ECI) chuan nimin Zirtawpni khan ram chhunga state 10-a Rajya Sabha seat 24 ruak tur hnawhkhah nan, June 18-ah inthlan neih a nih dawn thu a puang. Inthlan neihna tur tarlan zingah hian Mizoram seat khat pawh a tel a ni.

ECI tarlan danin, June 21 leh July 19 inkar hian Rajya Sabha member ni lai zinga mi 24-te term a tawp dawn a ni. Seat ruak turte Andhra Pradesh, Gujarat leh Karnataka-ah seat 4 ṭheuh, Madhya Pradesh leh Rajasthan-ah seat 3 ṭheuh, Jharkhand-ah seat 2 leh Manipur, Meghalaya, Arunachal Pradesh leh Mizoram-ah seat khat ṭheuh an ni. Term hmang zo turte zingah hian prime minister hlui H.D. Deve Gowda leh Congress president Mallikarjun Kharge te pawh an tel.

Inthlan neih tur atan hian June 1-ah hriattirna (notification) tihchhuah a ni dawn a, nomination paper thehluh theih ni hnuhnung chu June ni 8 a ni ang. June 18 chawhma dar 9 aṭanga chawhnu dar 4 thleng inthlan hi neih a ni dawn a, hemi ni vek hian tlai dar 5 aṭangin vote chhiar a ni ang.

Maharashtra leh Tamil Nadu-a Rajya Sabha seat pakhat ve ve a by-election neih tur atan June 18 ruat a ni bawk.