European Parliament-ah Anti-CAA resolution pulut

European Parliament-ah member ṭhenkhatin India rama Citizenship (Amendment) Act (CAA) siam thar duh lohna resolution an pulut a, hei hi sawihoin vote lak a ni dawn. 

Resolution hi Euro­pean United/Nordic Green Left (GUE/NGL) Group putluh a ni a, India-in citizenship pek theihna dan thar a siam  chu thil hlauhawm tak nia an ngaih thu an sawi. Resolution hi Nilaini-ah sawihoin, a tukah vote lak a ni ang. 

CAA duh lohna reso­lution puluttute hi Euro­pean Parliament, member 751 awmnaa member 559 te an ni. Hemi rual hian group dang, member 66 awmna chuan CAA thlawpna resolution an pulut ve bawk a, mahse hemi rual hian India rama CAA dodalna lantirtute chunga security force-te chet dan chhui chian an phut thu an tarlang tel nghal bawk. 

European Parliament-in CAA duh lohna reso­lution hi a pass a nih chuan India sorkar leh Parliament bakah Euro­pean Commission hotu­te hnenah an thawn chhawng leh dawn a ni. 

Thawhṭanni khan Lon­don-a Downing Street-ah CAA duh lohna lantirin kawngzawh huai­hawt a ni. He kawng zawhnaah hian India zirlai, activist leh human rights organisation ai­awh mi sang tel an tel a ni. Kawngzawh hi UK-a India zirlai pawl­te huaihawt a ni a, kawng­zawhnaa telte hian India ram danpui humhim an duh thu te, India ram ṭhendarh zawnga hmalak­na an dodal thu te, chi leh sakhua inthliarna an duh lohna thuziakte an keng a ni. 

'

London-a kawng­zawhte hian National Register of Citizens (NRC) leh National Popu­lation Register (NPR) an duh loh thu an lantir tel bawk. UK eptu pawl, Labour Party MP Sam Tarry chuan kawngzawhnaah hian thu sawiin, human rights kaihhnawih thil chu khawi ram pawh ni se ngaihzam theih a ni lo tih a sawi. "Ram tana ṭha lo tur dan siam a nih chuan kan aw kan chhuah a ngai a ni," a ti. Labour MP dang, Stephen Timms, Clive Lewis leh Indian-origin Nadia Whittome-te thuchah pawh chhiar chhuah a ni bawk.