Modi-a'n Pt Deendayal Upadhyaya lim a hawng
Prime minister Narendra Modi chuan nimin khan UP-a Varanasi khuaah Pandit Deendayal Upadhyaya lim, feet 63-a sang chu a hawng.
He lim hi BJP ideology hmanga ram siamṭhat tum hruaitute lim siam tawha sang ber a la ni a, kum khat chuang an siam a ni. He lim siam tur hian artisan 200 chuang rawih an ni a, Odisha aṭangin craftsmen leh artists 30 rual pawh an tel bawk.
Nimin khan Pandit Deendayal Upadhyaya Memorial Centre-ah he lim hawnna inkhawm hi neih a ni. Memorial Centre hi ram acre kua-a zauah siam a ni.
Varanasi-a lim hawng tura kal Modi hian video link kaltlangin IRCTC rel, Maha Kaal Express a vailiam bawk a, he rel hi India rama private train zana tlan ṭhin hmasa ber a ni. He rel hian Varanasi, Ujjain leh Omkareshwar-a Jyotirling hmun thianghlim pathum a tan tlang ang.
Modi hian Shri Jagadguru Vishwaradhya Gurukul kum za lawmna kharna a hman pui nghal a, he hunah hian Granth mobile app siam,
ṭawng 19-a lehlin Shri Siddhant Shikhamani Granth a tlangzarh nghal a ni. Ni hnih awh tur, 'Kashi Ek Roop Anek' chu a hawng bawk a, ramchhung leh rampawn aṭanga artisan-te a kawm nghal a ni.
PM hian a bial chhunga thawh tur, cheng vaibelchhe 1,200 hu project 30 chuang a hawng bawk. Banaras Hindu University-a damdawi-ina khum 74 leh sorkar damdawi-in hmun ṭhenkhatah khum 430 dah turte chu a project hawn zingah hian a tel.