Ramri kana firfiaka chetna lakah India-in inven theihna dan a nei : Parvathaneni

United Nations Security Council (UNSC) Thawhlehnia ṭhutkhawmah India aiawh, Permanent Representative ambassador Harish Parvathaneni chuan Pakistan lakah lungawi lohna tarlangin, Pakistan aṭanga cross-border terrorism thleng ṭhin lakah India chuan mahni invenna atana lo bei let turin dikna a neih thu leh, hremna erawh Pakistan hian a hmachhawn ngei a ngai dawn tih a sawi nawn leh.

Harish Parvathaneni chuan Pakistan deputy prime Minister Ishaq Dar-a'n Jammu & Kashmir chungchang leh Indus Waters Treaty an khawih zui chungchang thu a sawi chhuah chu a hnawl bawk. Pakistan thilsawi chu 'belhchian dawl lo leh dikna tel lo' a ni tih sawiin, India chu dikna fiah tak nena ding a nih thu a sawi.

Parvathaneni chuan, "India hian a din tirh phat aṭangin Pakistan aṭanga ramri paltlanga firfiak chetna leh beihna hi a lo hmachhawn tawh a ni," a ti. Pakistan chuan India hmasawnna tiṭhuanawp tur leh hliam tura an doctrine "bleeding India by a thousand cuts" leh firfiak pawl an thlawpna phenah, UN Charter chu an ngai pawimawh der a ni tih a tarlang.

China presidency-na hnuaiah UNSC debate hi neih niin, Pakistan-in firfiak pawl hmanruaa hmanga a thlawp rengna hi ti tawp a, firfiaka chetna zawng zawng titawp turin India chuan a phut. India-in a himna tura a hmalakna reng reng chu an dikna a ni a, Pakistan chuan firfiak chetna a thlawpnain a nghawng chhuah chu a hmachhawn zel dawn tih India chuan a tarlang nawn leh a ni.