NEET UG paper leak : Latur doctor leh Pune physics zirtirtu man

National Eligibility cum Entrance Test (NEET-UG) 2026 examination paper leak thubuai chhuina kal zelah, Central Bureau of Investigation (CBI) chuan Nilaini khan Maharashtra-a Latur khaw mi doctor pakhat leh Pune-a coaching institute pakhata Physics zirtirtu an man belh leh. He thubuaia mi man tawh zawng zawng chu 13 an tling ta a ni.

CBI thupuangtu chuan an mi man thar pahnihte hi Dr. Manoj Shirure (Latur-a physician) leh Tejas Harshadkumar Shah, Pune-a Dr. Abhang Prabhu Medical Academy-a Physics faculty an nih thu a sawi. Dr. Shirure hi zirlai pathum, RCC coaching centre neitu Shivraj Motegaonkar-a fapa pawh telin, NEET paper setter P.V. Kulkarni hnen aṭanga Chemistry zawhnate lo hmuh sak tura hma la hmasa bera puh a ni.

Pune zirtirtu Tejas Shah hi a hmaa an lo man tawh, Manisha Havaldar hnen aṭanga Physics zawhna put ru lo dawng a, zirlaite hnena hlan chhawngtu nia hriat a ni thung. CBI chuan tun thlengin ram chhung hmun hrang hrang 49-ah dap chhuah beihpui an thlak tawh a, evidence atan computer, laptop leh mobile phone engemaw zat an hreng tawh bawk.

NEET-UG exam hi paper leak avanga sawiselna a nasat avangin Ministry of Education hnuaia Department of Higher Education hriattirna angin May 12 khan thubuai ziah luh a ni. Exam hi cancel nghal niin, exam hmachawn nawn leh tur zirlai nuai 22 chuangte tana re-examination chu June 21-ah neih turin ruahman a ni.