Delhi-ah Public Health Emergency puang Thawhlehni thleng school khar dawn

Diwali festival hman hnuah Delhi khawpui boruak balin zual lam a la pan zel vangin nimin khan Delhi leh a chheh­velah public health emergency a puang. 

Public health emergency hi Environ­ment Pollution (Prevention and Control) Authority (EPCA) in a puang a, chief minister Arvind Kejriwal pawhin school-te chu karleh Thawhlehni thlengin khar an ni dawn tih a puang ve nghal bawk. 

Delhi-a school-te chu pawn lamah naupangte awm tir tam lo tura hrilhin, November 5 thleng outdoor activity leh sports te buatsaih lo tura hriattir an ni. 

EPCA chuan National Capital Region (NCR)-a pollution level chuan Ningani zan khan 'emergency or severe plus' category a thleng tih sawiin, hei hi kumin January thla hnu lam a thlen ṭum khatna a ni,  a ti. Hei vang hian boruak bal zel tur venna kawng khat atan November 5 hma chu in sak lam hna reng reng thawh khap a ni rih tih a sawi bawk. CM Kejriwal chuan nimin khan school naupangte hnenah hmai tuamna, mask semin Delhi chu 'gas chamber' ang mai a ni tih a sawi. Khawpui boruak balin zual lam a pan chungchangah an ṭhenawm, Haryana leh Punjab state te a puh tel bawk. Heng state-a loneituten an thlai ro an hal khu chuan nasa takin Delhi lam hi bawhin, boruak a tibal zual ṭhin a ni, a ti. 

Delhi khawpui boruak hi darkar 48 chuang 'severe plus' category-a a awm chuan, sorkarin boruak bal zel tur venna kawngah a theih anga hma lain, motor num­ber kawpkim leh kawpkim lo tlanchhawk tir, odd-even scheme leh khawpui chhunga motor lian, truck tlan luh khapna pawh hman mai a ngai dawn tih official-te chuan an sawi.