Airport-ah coronavirus kai an awm leh awm loh enfiah
Pathianni khan ram pawn thlawhtheihna 137 aṭanga rawn thlawk lut a chuang mi 29,707-te chu coronavirus an kai em tih airport-ah enfiahna neih a ni a, nimin khan thlawhtheihna 22-a chuang mi 4,359-te chu enfiah leh an nih thu Union Health Ministry chuan a tarlang.
Heng enfiah tawhte hi China rama hrileng mek coronavirus an kai loh thu tarlan a ni bawk. Ramchhunga thlawhtheihna ṭum hmun - New Delhi, Kolkata, Mumbai, Chennai, Bengaluru, Hyderabad leh Kochi airport-ah te hian enfiahna hi neih a ni. Kar liam ta khan Toronto Public Health chuan China rama Guangzhou khua aṭanga Tornoto-a haw mi pakhatin a kai tih hriatchhuah a ni a, hei vang hian India chuan a ranglamin hma a la ve nghal bawk.
Health Ministry hmalakna in ramriah pawh enfiahna neih nghal a ni a, India leh Nepal ramriah health team tirhluh an ni tawh bawk. Rinhlelh thuah mi pasarih chu Pune-a ICMR-NIV laboratory hmunah enfiah tura dah an ni. Kar liam ta Inrinni khan China aṭanga India-a rawn haw leh cham mekte tan Health Ministry chuan thuchhuah a siam a, an khua a sik emaw, an khuh leh hahchhiau emaw a chhuah chuan an hmai khuh phui ṭhin turin a ti a ni.