NEET-UG re-exam hmachhawn turin sorkar laipui inbuatsaih ṭan

NEET-UG exam, May 3-a neiha question paper leak vanga June 21-a exam neih ṭhat tur chu tluang taka neih a nih theih nan, Ningani khan union education minister Dharmendra Pradhan-a kaihhruaiin inbuatsaihnate thlirletna neih a ni a, exam thianghlim leh fel fai tak neih a nih theih nan 'Zero-Trust' kalpui a nih tur thu a sawi.

High-level review meeting-ah hian ISRO chief hlui K. Radhakrishnan, Higher Education secretary leh NTA director General Abhishek Singh te bakah thuneitu liante an tel. NTA Director General chuan exam-na hmunah venhimna khauh zawk leh surveillance khauh tak kalpui a, thil dik lo a thlen nawn loh nana ruahmanna thar an siamte a tarlang. "He exam-ah hian rinhlelh loh pakhat mah an awm dawn lo a, tu lakah mah rinna kan pe tawh dawn lo," tih thuthar thehdarhtute a hrilh.

Dharmendra chuan venhimna khauh tak kalpui a nih rualin, exam hmachhawn tur zirlaiten harsatna an tawh loh nan hmun hma siam sak a pawimawh hle tih a sawi. Khua a lum em avangin exam centre-ah te tui thianghlim in tur, ORS leh inthiarna hmun ṭha tak chhawp sak turin a hriattir. Zirlaiten an exam-na tur khua an thlan pawh thlak danglam phalsak an nih bakah, he re-test atan hian exam fee la lo turin sorkarin ruahmanna a siam a ni.

NEET-UG re-examination-ah hian zirlai nuai 22 aia tam an exam leh rin a ni a, ram chhung leh pawn lama khawpui 550-a centre 5,400 aia tamah exam hi neih a ni ang. Education Minister hian state chief minister-te leh UT a thuneitute hnenah June 21-ah zirlaiten harsatna an tawh loh nan leh exam centre pan nan sorkar bus-te a thlawna hmantir turin a ngen. NTA chuan exam hi Computer-Based Test (CBT) hmanga neih a nih tawh tur thu a sawi bawk.