India leh Canada-in 'Trade and Investment Forum' din

India leh Canada chuan ram pahnihte inkara sumdawnna leh inremna ṭha zawk a awm theih nan ‘Canada-India Trade and Investment Forum’ an din thar tih ram hruaitute chuan thuchhuah inṭawm siamin an puang. He forum thar hian ram pahniha sumdawng liante khaikhawmin, sumdawnna hmun thar siam leh thawh dunna tihhmasawnna kawngah a puih beisei a ni.

He hmalakna hi commerce and industry minister Piyush Goyal-a’n May 25-27 chhunga Canada a tlawh hnuah puanzar a ni. Canada minister of international trade Maninder Sidhu nen inbiakna an neih hnuah ram pahnih hruaitute hian sumdawnna kawnga thawh dunna nghet tak neih zui zel an duh thu an tarlang.

Ram pahnihte hian kumin kum tawp hma ngei hian ‘Comprehensive Economic Partnership Agreement (CEPA)’ inremna sawia tihfel hman an tum. He inremna hian sumdawnna kawng a hawn zauh bakah, bungrua leh hmanrua indawr tawnte leh ram pahniha kuthnathawkte inpuih tawnna kawngah nasa takin kawng a sial dawn a ni.

Forum hian clean energy, critical minerals, agri-food, advanced manufacturing, digital technologyleh thiamna bik (skills development) lama thawh dunna thar neihna tur a siam dawn bakah, mihring leh mihring inpawhna (people-to-people ties) leh sumdawngte veivahna tichangtlung turin thlawhtheihna service leh inbiak pawhna kawng pawh tihmasawn tum a ni. Canada chuan kumin chhung hian ‘Team Canada Trade Mission’ chu India-ah rawn tirh an tum thu an sawi bawk.