Australia Deputy PM India-ah a rawn zin dawn

Australia Deputy Prime Minister leh Defence Minister ni bawk, Richard Marles chuan kar tharah India a tlawh dawn. Richard Marles a cham chhung hian defence minister Rajnath Singh nen ram pahnihte ral beih leh venhimna lam inkungkaihna tihchak dan ngaihtuahin "2nd Australia-India Defence Ministers' Dialogue" an nei nghal ang.

Inbiakna neih turah hian ram pahnihte raldonaa thawh dunna hrang hrangte thlirlet a ni dawn a; Indo-Pacific bial chhunga venhimna dinhmun hrang hrang thlir hoin, ralrel leh thiamna lam inrawn tawnna tihchak dan tur kawng an zawng dawn a ni.

India a tlawh hmain Marles hian Singapore-a "23rd Shangri-La Dialogue" neih tur a hmanpui phawt dawn a, hei hi helai bial chhunga indona leh venhimna thila inrawnkhawmna pawimawh tak a ni bawk. Singapore a cham chhung hian tuipui lam venhimna chungchang plenary session-ah thu a sawi bakah, khawvel hruaitu dangte nen venhimna chungchang an sawi ho bawk ang.

India nena inbiakna a neih tur chungchangah thuchhuah siamin Marles chuan, "Australia leh India hi venhimna lama thawk dun hnai tak kan ni. Nikum lama defence minister Rajnath Singh-a'n Australia a rawn tlawh ṭuma hmasawnna kan neih tawhte chhunzawmin, kan inlaichinna tihchak zual zel kan beisei," tiin a sawi.

India leh Australia sipai hotute chuan kumin hian tuipui lam venhimna leh thawh dunna tiphuisuitu tur ‘Joint Maritime Security Collaboration Roadmap’ chungchangte an sawi zui leh tura ngaih a ni.