India leh Bangladesh-in border talk nei dawn

Bangladesh-a Bangladesh Nationalist Party (BNP) sorkar thar a pian hnua a vawi khatna atan India leh Bangladesh ramri venhimna chungchang ngaihtuahna hun pawimawh tak neih a ni dawn. Sorkar hriattirna tihchhuaha tarlan danin, June 8 - June 11 inkar hian New Delhi-ah ram pahnih aiawhte chu an ṭhukhawm dawn a ni.

He inbiakna hi kum khata vawi hnih neih ṭhin, Director General (DG) level border talk a ni a, Delhi-a Border Security Force (BSF) hmunpui pakhatah neih a ni ang. Bangladesh aiawh hian Border Guard Bangladesh (BGB) Director General, Maj Gen Mohammad Ashrafuzzaman Siddiqui-a hoin palai an rawn kal dawn a, India aiawhte hi BSF Director General, Praveen Kumar-a'n a ho ang.

Inbiakna neih turah hian ramri hungna (border fencing) la zawh fel loh hrang hrang te, dan loa luhrukna thleng ṭhin chungchang te, leh ramri kana thil sual hluar chho mek laka hmalak dan turte sawi ho a ni ang. Ram pahnih palaite hian ramri venhimna kawnga thawh dunna tihchak lehzual dan tur bakah, June 11 khian inbiakna thutlukna hrang hrang ziahna (joint record of discussions) an nei nghal bawk ang.

Sorkar thuneitute chuan India leh Bangladesh hian ramri kilometer 4,096 athui an in ṭawm thu an sawi a; hmun khawkrawk leh tlang ram chheng chhia, luipui leh Sunderbans tamna hmun a nih avangin kilometer 860 a thui chu tun thlengin hung lohin a la awm a ni. He thil hi ram pahnih venhimna atana harsatna lian tak a nih avangin he ṭhutkhawmah hian uluk taka ngaihtuah a ni dawn a ni.