UK Foreign Secretary-in India tlawh dawn

United Kingdom foreign secretary Yvette Cooper chuan khawvel huapa harsatna hrang hrang chipchiar taka sawi ho leh thawh hona tihchak nan vawiinah India tlawh turin a rawn zin dawn. India a tlawh hma hian nimin Thawhṭanni khan China a tlawh hmasa a, ram pahnih a tlawh chhung hian khawvel pum tana thil pawimawh tak tak sawiho a ni ang.

Foreign, Commonwealth and Development Office (FCDO) chuan, ram pahnih tlawhnaah hian Strait of Hormuz-a boruak ṭha lo awm mek te, Russia-in Ukraine a beihna chungchang leh Africa rama Ebola hri leng thar chungchang te sawi ho a ni dawn tih a tarlang. Khawvel hmun hrang hrangah chhiatna leh indona a thleng mek a, hei vang hian Cooper zin kual pawh hi ram lian zawk te tana inremna siam nan a pawimawh dawn nia sawi a ni.

UK foreign secretary hian vawiin hian Beijing-ah China vice president Han Zheng leh foreign minister Wang Yi te a hmu phawt dawn a, naktukah Shenzhen-ah Science leh Technology lam thilte a tlawh ang. Hemi hnuah India lam panin, Ningani khian India external affairs minister Dr. S. Jaishankar nena inbiakna an nei ang.

India a tlawh chhung hian 'U.K.-India Vision 2035' thutlung tihpuitlinna atana thawk mektu sumdawng lian te, mithiam te leh sorkar hotu hrang hrangte a kawm dawn bawk a ni. India leh UK inkara sumdawnna pawh a ṭhang nasa hle a, kum 2025 chhung khan pound tld 47.4 tlingin, a hma kum aiin 11.7%-in a sang zawk.