India-in Inrawlh lo turin Turkey President hriattir
Kar liam ta Zirtawpnia Pakistan-a zin Turkey president Recep Tayyip Erdogan chuan Jammu & Kashmir chungchang a sawi avangin, Ministry of External Affairs-in ram chhung inrelbawlnaa inrawlh lo tura hriattirin thuchhuah a siam nghal. J&K chungchang hrim hrima Turkey leh Pakistan thuchhuah siam chu hnawl sak vek an nih thu MEA chuan a thuchhuahah a tarlang.
Ni hnih chama Pakistan-a zin Erdogan chuan a thusawinaah, J&K chungchang sawi chhuakin, "Nikum khan J&K mipuite zalenna laksak a ni a, hei vang hian J&K mipuite chuan harsatna an tawk mek a ni. Dikna leh intluktlanna hmangin J&K harsatna hi sutkian theih a ni," a ti.
External Affairs ministry thupuangtu, Raveesh Kumar chuan Kashmir chu India ram chhung, India aṭanag la hran theih loh a ni tih sawiin, India ramchhung inrelbawlnaah Turkey President chu inrawlh tawh lo tura an ngen thu a sawi.
India leh Pakistan hian Kashmir hi hun rei tak an inchuh tawh a, kum 1947-a India aṭanga Pakistan ṭhen hran a nih hnu khan ram pahnihte hi ṭum thum ngawt an lo indo tawh a ni. J&K hi ram pahnihte chuan an ramah chhal ve ve a ni.