CBI-in Air Force hotu hlui hreng

Central Bureau of Investigatin (CBI) chuan Air Force hotu hlui SP Tyagi chu cheng vaibelchhe 4,000 dawn man, AgustaWestland VVIP chopper leina tura contract siam chungchangah, dik lo taka thiltiah puh a nih avangin Inrinni khan an man a, ni li chhung an kawl ang. Tyagi rual hian midang pahnih man an ni bawk.

CBI chuan Tyagi thu zawhfiahna aṭang hian thil dik lo lian tak thleng haichhuahna tura thil pawimawhte an hriatchhuah theih ngei ringin, ni 10 chhung kawl an dil a, mahse Delhi court chuan ni li an kawl a phalsak. Tyagi ruala mante hi a laichin Sanjeev leh advocate Gautam Khaitan-te an ni.

Tyagi hi military chief ni tawh zinga eiruk thubuaia man hmasak ber a ni.

Air Force hotu nilai, Arup Raha chuan Tyagi man a ngai chu thil vanduaithlak tak tak a nih thu sawiin, air force hming a tichhe hle a ni, a ti.

CBI chuan court hnenah Tyagi hian air chief marshal a nih laiin a thuneihna dik lo takin a hmang tih a hrilh. A sum lakluhna tarlang si loin ram leh bungrua tam tak a nei a ni tih a sawi. Mahse Tyagi chuan a ram neih zat chu a puanzar theih vek thu court hnenah hian a hrilh ve nghal a ni.

SP Tyagi hian UK-a helicopter siamtu company, AgustaWestland company hnen aṭanga India Air Force hman tur helicopter lei a nih theih nan, inkaihhruaina dan zawm loin helicopter thlawh san theih zawng tura bituk chu a lo tihniam niin CBI chuan a sawi. Kum 2013 khan he thil avang hian Tyagi leh a thurualpui nia puh mi 18-te lakah thubuai ziah luh a lo ni tawh a ni.