Chanchinbu hmanga ei tur fun a him lo : FSSAI

Food Safety and Standards Authority of India (FSSAI) chuan chanchinbu phek hmanga ei tur fun leh chhawp ṭhin chu mihring hriselna atan a him tawk lo tih a sawi.

FSSAI chuan kawtthlera ei tur siamtu leh zuartuten an thil zawrh tuamna atana chanchinbu phek an hmang ṭhin chungchangah thuchhuah siamin, ei turte chu thianghlim taka siam ni mah se, chanchinbu pheka tuam leh fun hian zawimuangin mihring hriselna a tichhe thei a ni tiin, hei hi tihfo chi a ni lo, a ti.

Union Minister of Health and Family Welfare JP Nadda chuan ei tur funna atana chanchinbu phek hman a nih ṭhin chungchangah mipuite zirtirna leh khuahkhirhna siam turin FSSAI a ngen hnuah he hriattirna hi tichhuah a ni.

FSSAI chuan chanchinbu chhutna, printing ink-ah chuan bioactive material tam tak, mihring hriselna atana pawi thei a awm tih a sawi. Newspaper, paper leh cardboad box tam tak chu recyle paper a ni tih sawiin, hengah hian chemical lam thil bakah, metallic, mineral oil leh chemical hlauhawm tak phthalates te a awm niin a sawi bawk. Hetiang lehkhaa fun ei tur eitute chuan cancer kaihhnawih natna chi hrang hrang an kai a hlauhawm a ni, a ti. Chanchinbu te chu ei tur tuamna leh chhawpna atan hman tur a ni lo tih a sawi a, ei bakah hian thil kan mawm lutuk pawh ei lo turin mipuite a chah bawk.