Delhi Law Firm aṭangin Rs vbch 13 chuang man

Delhi Police te chuan Delhi chhim lam, Greater Kailash-I biala T&T law firm office
aṭangin pawisa fai cheng vaibelchhe 13 chuang an man a, heng zinga cheng vaibelchhe 2.5 chu pawisa note thar a ni.

Police-te chuan law firm hi Inrinni zan dar 10.30 khan an dap a, pawisa hi cupboard leh suitcase-ahte an hmu a ni. T&T law firm daptute hi Crime Branch an ni a, pawisa fai an man hnu hian I-T department an hriattir nghal a ni.

Law firm aṭanga pawisa man zinga cheng vaibelchhe sarih chu Rs 1,000 note hlui a ni a, Rs 100 note in cheng vaibelchhe thum a awm bawk. Police-te an kal lai hian room tam zawk chu kalh a ni a, office enkawltu chauh a awm.

He firm neitu hi Rohit Tandon a nia, tax department chuan thla hnih liamta khan Tandon-a chenna in hi an lo dap tawh bawk. Hemi ṭum hian a lakluhna hriat chian loh, bank-a fixed deposit-a cheng vaibelchhe 10 a dahna document an hmu a ni.

Karnataka-ah pawh Income Tax department-in Challakere khuaa dealaer ina bathroom tile chhungah pawisa tam tham tak leh rangkachak leh tlereuh dang kg 32 thuhruk an man bawk. Pawisa fai an man hi note thar cheng vaibelchhe 5.7 leh pawisa note hlui cheng nuai 90 a ni.

Tamil Nadu-ah IT depatment hian Vellore-a sumdawng Sekhar Reddy-a car aṭangin pawisa note thar, cheng vaibelchhe 24 leh rangkachak kg 50 an man bawk.