Amit Shah in lam pana kawng zawh tum ṭhulh

Shaheen Bagh-a Citizenship Amendment Act, 2019 (CAA) duh lohna lantira nawrh huaihawtte chuan nimin chawhnu khan union home minister Amit Shah in lam pana kawng zawh an tum thu sawi mah se phalna an hmuh loh avangin an ṭhulh lailawk.

Nawrh huaihawtte hi Delhi Police-te chuan kawng zawh phalna an pe lo a, hemi avang hian Home Minister in pan an tum pawh hi an ṭhulh rih a ni. RP Meena, DCP (South East) chuan nawrh huaihawtte hian Union Home Minister hnen aṭanga kohna an dawn loh avangin kawng zawh hi an remtih sak lo tih sawiin, inbiakna an neihpui thu pawh a sawi.

Hmeichhe nawrh huaihawt, Dadis of Shaheen Bagh tia sawite hian phalna an hmuh hma chuan Saheen Bagh-ah chuan nawrh chhunzawm zel an tum tih sawiin, thil kalphung awmsa chu bawhchhiat an tum lo a ni.

Citizenship Amendment Act, 2019 duh lohna lantira nawrh huaihawtte hian Amit Shah chu hmuha, an duhdante thlen an tum a, a in thleng kawng zawh an tum a ni.