Cyclone Vardah vangin mi 9,400 sawnchhuak

Cylcone Vardah tleh vangin nimin khan Andhra Pradesh leh Tamil Nadu-ah mi 9,400 hmun him lamah sawnchhuah an ni.

Thlipui hian nimin chawhnu lam khan Chennai bul leh Sriharikota a thleng a, ruahtui a pai tel avangin ruah nasa takin a sur zui bawk. Thlipui tleh dawn vang hian state pahnihte hi an lo inring lawk a, a ṭul huna che chhuak thei turin Navy leh Air Force-te dah an ni bawk. Chennai-a flight service pawh eng emaw zat cancel leh tihkhawtlai a ni.

Tuipui kama chengte chu thlipui tleh dawn avang hian hmun him lamah sawnchhuah lawk an ni. Navy chuan lawnglian pahnih chu hman theih tura a buatsaih sa a sawi a, hetah hian doctor-te dah an ni bakah, mi 5,000 tan ei tur leh tui thianghlim an dah lawk a ni. Diving team 30 bakah chhawmdawlna hmanrua hrang hrangte chhawp a ni bawk.

Chennai bul, Tambaram-a Air Force Base pawhin a
ṭul dan anga che chhuak thei tura an inrin reng thu an sawi. Tuipui kamah hian National Disaster Relief Force team 15 dah lawk an ni bawk a ni.

Chennai, Kancheepuram leh Tiruvallur-ah te school leh college khar vek a ni a, Tamil Nadu sorkar chuan private office-te hnenah an hnathawkte pawh chawlh phalsak turin a lo ngen tawh a ni.

National Disaster Management Authority chuan mipuite chu pawn chhuak lo leh, hmun him laia awm turin a ngen a, state sorkar leh disaster ma≠nagement agency-te thawhpui turin a ngen. Chennai-ah chuan thlipui tuarte awm lailawkna turin relief center 174 siam a ni.

Andhra Pradesh Chief Minister N Chandrababu Naidu pawhin an state-a thlipui tlehna bial, Nellore district thuneitute hnenah chuan hmun hniam lama chengte chu sawnchhuak turin alo hriattir lawk tawh a, official-te hnenah thlipui tleh leh ruahsur avanga thihna a thlen lohna tura theihtawp chhuah turin a hrilh.