Ramchung lawrkhawm

Hnam hla play laia din loh vangin thubuai siamsak

Supreme Court-in cinema hall-a film tihchhuah dawnin hnam play hmasa zel tur leh, hemi chhunga mipuite chu an ṭhuthmuna ding vek tura hriattirna a tihchhuah hnuah, Pathianni khan Chennai Kasi Theatre-a hnam hla play laia ding duh lo mi pasarihte chu thubuai siamsak an ni.

Mi pasarih thubuai siamsak zingah hian hmeichhe pakhat a tel a, Theatre-a hnam hla play lai hian ding loin an lo selfie a ni. Hei vang police-ah complaint thehluh a ni a, ṭpolice-te chuan Prevention of Insults to National Honour Act, 1971 hnuaiah thubuai an siamsak ta a ni.

Jaya-i uitu mi 470 an thi tawh

Tamil Nadu-a rorellai, AIADMK chuan December 5-a thi, chief Minister hlui Jayalalithaa-i chu amah uitu mi 470 in an thihphah tawh niin a sawi a, thi chhungte hnenah hian cheng nuai thum ṭheuh pek an tum thu a sawi.

Jaya-i thih avang hian mi paruk chuan intihhlum an tum a, mahse heng mite hi chhan hman niin enkawl an ni a, an inenkawlna senso atan an party chuan Rs 50,000 ṭheuh a pe dawn bawk. Jaya-i September 22 aṭang khan Chennai-a Apollo Hospital-ah enkawl a ni a, lung lam ṭhat lo avangin December 5 khan a thi a ni.

Indonesia Pre. a rawn zin

Indonesia President Joko Widodo chu ni hnih cham turin Pathianni zan khan Delhi a rawn thleng a, kum 2014 October thlaa thuneihna a chan hnua India ram a rawn tlawhna hmasa ber a ni.

Nimin zing khan Rashtrapati Bhawan-ah Indonesia President lawmna hi neih a ni a, hemi hnu hian President Pranab Mukherjee leh Vice President Hamid Ansari-te a kawm nghal a ni. President Widod hi palai eng emaw zatin an rawn zui a, cabinet minister, senior official te bakah sumdawng palai mi 22 an tel.