BJP MP leh MLA-te declaration form pe

BJP chuan an party MP leh MLA-te chu November 9 leh December 30 inkara an sum khawih chet dan puanzarna tur, declaration form a pe chhuak.

Party MP leh MLA-te sum neih dan leh, an khawih chet dan chu an chhiah pek dan nen uluk taka enmil a nih tur thu a sawi.

Declaration form hi party president Amit Shah chuan party hruaitute a thawn vek a, sorkar laipuiin pawisa note a tih thih tuk, November 9 aṭanga bank-a pawisa note hlui thleng theih hun, December 30 chhunga banking transaction an tih dan kimchang thehlut turin a ti a ni. Hemi hun chhunga bank leh post office-a pawisa an dah luh zat te, pawisa note hlui an thleng zat te, an bank account neih zat leh an bank account (savings or current) tihte zawh an ni. Hei bakah hian member-te chu khawi aṭanga an sum hmuh nge an deposit tih pawh tarlang tura tih an ni bawk.

November 30-a BJP parliamentary party meeting neihah khan, Prime Minister Narendra Modi chuan an party legislator-te chu an sum neih zat leh an account an khawi chet dan kimchang thehlut turin a lo ti tawh a ni. Hei hi eptu party-teín, pawisa note tih thih tur chungchang hi BJP hruaitu ṭhenkhatten an lo hre lawk a, an sum kawlte an lo chingfel hman vek nia an puh vanga ti an ni.