India leh South Africa-in thawh dunna tihhmasawnna tur sawi dun

External affairs minister (EAM) S. Jaishankar leh South Africa deputy president Shipokosa Paulus Mashatile-te chu Thawhlehni khan New Delhi-ah an inkawm a, ram pahnih inkara sumdawnna leh hmasawnna hrang hrang thawh dunna tura hmalakna turte an sawi dun. An inkawmnaah hian sumdawnna, investment, micro, small and medium enterprises (MSMEs), digital technology leh infrastructure chungchangte an sawi a ni.

South Africa Deputy President chuan ram pahnih inlaichinna thuk tak chu chhunzawm zel an duh thu sawiin, an tan India chu sumdawnna leh khawvel huapa thawhpui tlak a nih thu a sawi. India-SACU (Southern African Customs Union) Free Trade Agreement pawh a hma thei anga tihfel an duh thu a tarlang bawk.

Jaishankar pawhin X-ah thuchhuah siamin, South Africa in thawhpui tura a inpekna chu lawmawm a tih thu a sawi. Deputy president Mashatile hi India-ah ni ruk cham turin a rawn zin a, president Droupadi Murmu leh vice president CP Radhakrishnan-te pawh a hmu nghal a ni.

South Africa Deputy President hi a nupui Humile Mashatile leh minister dang pariat ten an rawn tawiawm a ni. South Africa chu sumdawnna hmun ṭha tawk a ni tih lantir leh India nena sumdawnna tihlen chu an tum ber a ni. Inbiakna neih zawh hnu hian Mashatile chuan ram pahnihte inkara inlaichinna, a bik takin sumdawnna leh eizawnna lama hmasawnna kawnga thuk zawka hmalak an tum thu a sawi.