Delhi-a restaurant kangah mi 21 thi

South Delhi-a Malviya Nagar-a Lemon Green Restaurant-ah Nilaini zing khan kangmei chhuak avangin mi 21 an thih bakah, hliam tam tak an awm bawk. Chhiatna thlenga thi zingah hian Central Asia leh Africa aṭanga lo zin ram dang mi eng emaw zat an tel a ni.

Chhiatna thleng hi chhan chhuahna hna thawktute chuan an hriat veleh Delhi Fire Service (DFS) motor eng emaw zat an tir nghal. Kangmei chhuahna building hi chhawng ngaa sang niin, a hnuai berah restaurant hi a awm a, a chung lamah khualbûk (hotel) a awm thung a ni. Kangmei chhuah ṭan chhan tak erawh hriat chian a la ni lo a, hriat chian tumin chhui chianna an kalpui nghal.

Kangmei a chhuah lai hian khualbûk chhunga awm mi tam tak chu an la mu a, mei khu leh alh hian a uap hneh hman hle a ni. Chhan chhuah hna thawktu leh tualchhung mite ṭang rualin mi 40 chuang an chhan chhuak thei a, hliamte hi damdawi in hnai ber pan pui nghal an ni.

Prime minister Narendra Modi chuan chhiatna thleng hi pawi a tih thu sawiin, nunna chan chhungte a tawrhpui thu sawi. Prime Minister’s National Relief Fund (PMNRF) aṭangin thi ta chhungte hnenah zangnadawmna Rs 2,00,000 leh hliam tuarte hnenah Rs 50,000 ṭheuh puihna pek a nih tur thu a puang nghal bawk.