TN-ah thlipui tleh vangin mi 10 an thi

Tamil Nadu-ah thlipui, Cyclone Vardah tlehin chhiatna a thlen avangin mi 10 an thi. Thli tleh hian Chennai khawpuia thingkung 4,000 vel a len tlu a, power line eng emaw zat a chhe bawk.

Thawhṭanni tlai khan thlipui hian Tamil Nadu hi a nuai a, chhiatna a thlen vanga thi hi Chennai-ah mi pali, Kancheepuram leh Tiruvallur-ah mi pahnih ve ve, Villupuram leh Nagapattinam-ah mi pakhat ve ve an ni. Thlipui avang hian Andhra Pradesh-a Chittoor district-ah mi pahnih an thi bawk.

Tamil Nadu Chief Minister O Pannerselvam chuan thlipui tleh vanga thi chhungte chu zangnadawmna pek an ni tur thu a sawi. CM chuan tuipui kama cheng, mi 10,000 chuang chu hmun him lamah sawnchhuah an ni tih a sawi. Andhra Pradesh-ah pawh mi 9,000 chuang relief camp-ah dah an ni.

Thli tleh leh ruahsur vanga Thawh-ṭanni-a Chennai airport-a flight service tikhaihlak chu nimin zing aṭang khan dan pangngaia kalpui a nileh tawh. Nimin lam khan thli tleh hi reh tawh mah se, ruah erawh a la sur chhunzawm dawn niin Met office chuan a sawi. Chennai khawpuia dawr leh hotel-te chu nimin khan hawn ni mah se, zirna in hrang hrangte erawh chu khar an ni.