Ramchhung Lawrkhawm

ED-in cheng nuai 93 leh mi pasarih man

Enforcement Directorate (ED) chuan sorkar laipuiin pawisa note lian pahnih a tih thih hnua dan loa pawisa note hlui thlengna hmun dapchhuakin, mi pasarih a man a, pawisa fai cheng nuai 93 a man tel bawk.

Agency chuan mi pasarih-te hi Prevention of Money Laundering Act (PMLA) hnuaiah man an nih thu sawiin, an zingah hian sorkar official chhung hnai tak pakhat pawh a tel tih an sawi. Pawisa fai, cheng nuai 93 an man hi pawisa note thar, Rs 2,000 note vek a ni. ED chuan mi pasarih an mante chuan bank official ṭhenkhat thurualpuiin, pawisa note hlui thlengnaah hian commission 15-35% te an laksak ṭhin niin an sawi.

CBI-in RBI-a thawk man

Central Bureau of Investigation (CBI) chuan pawisa thi, cheng vaibelchhe 1.51 thlengnaa inhnamhnawiha puh, Bengaluru-a Reserve Bank of India (RBI) a thawk pakhat an man.

RBI-a thawk an man hi Senior Special Assistant K Michael a ni a, a thurualpui nia puh midang pahnih an man tel bawk. An kut aṭang hian pawisa note thar cheng nuai 16 an man a ni. Michael hian pawisa thi, Rs 500 leh Rs 1,000 note tam tham chu Bengaluru-a State Bank of Mysore kaltlangin thleng a tum nia sawi a ni.

Parliament beihnaa thi te zahna hlan

Prime Minister Narendra Modi leh MP-te chuan nimin khan kum 2001-a parliament beihnaa thi te zahna an hlan.

Parliament compound chhunga hriatrenga siamah PM Modi bakah hruaitu hrang hrangten zahna pangpar an dah a ni. Kum 2001, December 13 khan firfiak panga-teín Parliament compound hi lutin an bei a, firfiakte an beih letnaah Parliamentary Security Service mi pahnih, Delhi Police mi panga leh Central Reserve Police Force (CRPF)-a hmeichhe constable pakhat bakah huan enkawltu pakhat an thi a, mi dang 25 in hliam an tuar a ni.