Vawiin aṭangin Covid-19 vaccine pe ṭan dawn

Ram pumah vawiin aṭangin Covid-19 vaccine pek chhuah ṭan a ni dawn ta. Prime minister Narendra Modi chuan zing dar 10:30 video conference hmangin vaccination drive hi a hawng dawn a, a hawnna buatsaih hian state leh UT-a vaccine pek chhuahna tur hmun 3,000 chuangin virtual-in an lo telpui dawn a ni. 

State hrang hrangah vaccine pek chhuahna tura siamah vaccine pek ṭan ni hian mi 100 vel ṭheuh hnenah pek an ni dawn a, a ni khat ni hian mi nuai thum velin vaccine hi an dawng ang. Vaccine pek chhuahna hi 3,000 chuang hret siam a ni a, reilote hnuah 5,000 chuang a awm beisei a ni. Vaccine pek chhuahna tinah hian team member panga leh vaccinator pakhat zel an awm ang. 

Union health ministry chuan state tin hnenah ni khatah vaccine pek zat tur hi ruahmanna fel tak nena siam turin a chah. Vaccination pro­gramm-ah hian vaccine pek leh semchhuah dan enpuina tura digital platform,  Co-WIN (COVID Vaccine Intelligence Network) App siam chu hma na ni ang. Covid-19 hri chungchang, vaccine pek chhuah dan leh Co-WIN software chungchang zawhfiah duhte tan 24x7 call centre - 1075 siam a ni bawk. Covid-19 vaccine dawng turte chuan Co-WIN kaltlang hian an in register hmasak zel a ngai dawn a ni. 

Election Commission chuan vaccine dawngtu, beneficiary-te nihna finfiahna atan sorkar chu a puih tur thu sawiin,voter data hman a remtih sak. Mahse an vaccine an lak zawh fel hunah erawh an data chu paih nghal turin a phut thung. 

Nikum December thla khan union home secretary Ajay Bhalla chuan chief election commissioner Sunil Arora hnenah vaccine sem chhuahnaah, polling state level-a kum 50 chung lam chinte finfiah an nih theihna tura pui turin a lo ngen tawh a ni. 

Home secretary chuan sorkar chuan cyber security him thei anga bera kalpui a tum tih a sawi bawk. Poll panel hnenah an data pawh chu vaccine pekchhuahna atan chauh hman a ni dawn tih a tiam. 

EC-in data hman a remtih sak avangin, Covid-19 vaccination drive neihnaah hian Lok Sabha leh assembly inthlan neih hnuhnung bera electoral roll-te chu kum 50 chung lam chin finfiahna atan hman an ni dawn ta a ni. Beneficiary identification atan hian indentity document 12 a ngai a ni.