Army Day pualin sipaite duhsakna hlan

Prime minister Narendra Modi chuan nimin, Army Day vawi 73-na pualin India sipaite duhsakna a hlan a, ram mipuitea sipaite chu an chhuang hle tih a sawi. 

PM chuan a twitter-ah, "Kan sipaite hi an chakin, an huaisen a, an tumruh hle bawk. Englai pawhin India ram mipuite inchhuanna an ni a, ram mipui zawng aiawhin Indian Army chu zahna chibai ka buk e," tiin a ziak. President Ram Nath Kovind pawhin sipaite duhsakna hlanin, an huaisenna leh ram tana an inpekna avangin India chu an chungah a lawm reng dawn a ni, a ti. 

Indian general hmasa berin British officer hnen aṭanga thuneihna a lakchhawna champha, January 15 hi Army Day-ah hman zui niin, kumtin lawm a ni ṭhin. Kum 1949 khan a hmasa ber atan Indian Army hotu lu atan India mi ngei dah a ni a, Lt Gen KM Carriappa chuan India rama British commander-in-chief hnuhnung ber General Francis Butcher hnen aṭangin thuneihna a la chhawng a ni. 

Army Day hi Army Command headquarters hrang hrangah hman a ni ṭhin a, he hunah hian sipai huaisen chawimawina pawh sem a ni ṭhin.