Union minister-te leh loneitute inbe leh

Farm law thar duh lohna lantira nawrh huaihawt mek, loneitu pawl aiawhte leh union minister pathumte chuan nimin chawhnu lam khan inbiakna an nei leh. Hei hi thla khat chuang nawrh huaihawt a ni tawh hnua inremna zawnga inbiakna an neih ṭum kuana a ni. 

Nimina inbiaknaah hian sorkar laipui aiawhin agriculture minister Narendra Singh Tomar; railways, commerces and food minister Piyush Goyal leh minister of state of commerce Som Parkash te an tel a, loneitu pawl 40 vel aiawhte nen Delhi-a Vigyan Bhawan-ah an inbia. 

Ram chhung hmun hrang hrang aṭanga loneitu kalkhawmte chuan thla khat chuang chu Delhi border-ah farm law thar pathum duh lohna lantirin nawrh hi an huaihawt tawh a ni. Kalkhawm zinga a tam zawk hi Punjab, Haryana leh Uttar Pradesh-a loneitute an ni. 

Inremna kawng zawngin sorkar leh loneitu pawl aiawhten inbiakna ṭum riat an lo neih tawhah inremna an la siam thei lo a, sorkar laipui chuan January 11 khan heng dan thar pathumte hi hman rih loh turin a lo stay sak tawh bawk.