India-US security thawh dunna pualin 'Freedom 250 Memorial Motorcycle Rally' nei

Kolkata-a U.S. Consulate General leh West Bengal sorkar ṭangkawp chuan June 8, nimin khan India leh U.S. tana nun hlantu police-te hriatrengna leh ram pahnihte venhimna kawnga thawh dunna pualin ‘Joy-Freedom Ride’ motorcycle rally hmasa ber an buatsaih. Rally hlawhtling taka neih a nih hnu hian American Center-ah pangpar hlanna hun hman a ni bawk.

He hun hi America zalenna kum 250 tlin lawmna ‘Freedom 250’ campaign puala buatsaih a ni. Kum 2002-a American Center beih a nih laia huaisen taka hmelma lo hmachawn a, he hmun humhim nana an nun hlantute—Kolkata Police officer panga: Pijush Sarker, Ujjal Burman, Suresh Hembram, Anup Mondal, leh Sheikh Ashraf Ali te zahna leh chawimawi hlan an ni.

U.S. Consul General Kathy Giles-Diaz chuan thu sawiin, “Motorcycle a tlan theihna tur chuan a hma leh hnung-ah ke hnih a neih ngai a, chutiang bawkin U.S-India thawh dunna pawh hi ram pahnihte inpuihtawnna hian a tungding a ni,” a ti. Indo-Pacific bial zalenna, huam zau, leh him a awm theih nana an thlirna thuhmun chuan hma lam a panpui zel thu sawiin, Kolkata Police-te inpekna leh huaisenna chu a fak a, he buaina thleng avang hian zalenna leh remna vawng nung turin thawhpuite inhuamna thuk tak a lo pian phah zawk thu a sawi.

Rally hi zing lamah neih niin American diplomat, Indian police officer, motorcycle ngainatu leh sumdawnna lama an thawhpuite nen mi 250 an pungkhawm thei a ni. American Center aṭanga ṭanin Kolkata khawpui hmun pawimawh leh hmun hlu tak tak—Victoria Memorial, Princep Ghat, leh Kolkata Police Headquarters awmna Laal Bazar te an hrut a ni.

Hmalakna hi U.S. Consulate Kolkata hnuaia Overseas Security Advisory Council (OSAC) hotute leh tualchhung sumdawnna hmun lian Speed Group, PepsiCo, leh Hyatt Regency Hotel Kolkata te nena thawk hoa neih a ni. Thuneitute chuan kum 2026-a ‘Joy-Freedom Ride’ hmasa ber hi kum tina neih zui zel an beisei thu tarlangin, ram pahnih inpumkhatna leh inhriatthiamna chu hma lam panin a kal zel dawn a ni tih an sawi.