PM Modi kaihhruai sorkarna kum 12 tlin pualin PM-in thuchhuah siam

Prime minister Narendra Modi-a kaihhruai sorkar laipui chuan Pathianni June 7 khan kum 12 a tling a, hemi pual hian PM Modi chuan nimin khan thuchhuah siamin, sorkar hmalakna hrang hrang aṭangin ramin nasa taka hmasawnna leh danglamna a hmu tawh tih a sawi.He danglamna lo awm zawng zawng zinga an ngaih pawimawhber chu rethei leh pachhiate chawikan leh dawm kan a ni, a ti.

Modi chuan an sorkar kalphung chu ‘Antyodaya’ (mi hnufual berte chawikan) tih thuvawnah a innghat tlat tih sawiin, kum tam tak chhung ngaihsak hlawh lo leh hnuchhawn tawhte hnen thlenga hmasawnna rahbi chher chu an tum ber a nih reng thu a tarlang. Jan Dhan accounts, Direct Benefit Transfer (DBT), Swachh Bharat Mission, PM Awas Yojana, Jal Jeevan Mission leh Ayushman Bharat te chu mipuite dikna leh hamṭhatna lian tak petu hmanrua an nih thu a sawi bawk.

Technology pawhin retheite nunphung tihhmasawnna kawngah hmun pawimawh tak a chang tih sawiin, DBT leh digital platform hmanga ṭanpuina mipuite hnen a thleng hian eiruk leh hlemhletna a tihniam a, mipui pawhin sorkar an rintawkna a tinghet zual tih PM chuan a sawi. He hmalakna hi ‘Garib Kalyan’ (Rethei te hamṭhatna) aṭanga inṭan niin, tunah chuan mipui huapzo movement-ah a chang tawh a, ‘Viksit Bharat’ dinna tura kawng pawimawh ni, a ti.

PM Narendra Modi hian kum 2014 khan sorkarna hmasa ber chelh ṭanin, kum 2024 Parliamentary inthlanpui zawh khan a zawna a vawi thumna atan Prime Minister hna hi a chelh zui leh a ni.