DSP Singh chhui chiang turin NIA Kashmir-ah kal

Firfiakte puia puh anih vanga a hna aṭanga an ban tak, Deputy Superintendent of Police (DSP) Devinder Singh thubuai neih mek chhui chiang turin kar liam ta Inrinni khan National Investigation Agency (NIA) team member 20 awmna chuan Kashmir an thleng. 

NIA hian nimin aṭang khan DSP Singh thubuai chhui hna hi an ṭan nghal a, Kashmir a rinhlelh thil awm thei zawng zawng chu chhui kim vek an tum bakah, private office leh a chenna inte dap an tum leh bawk a ni. A bik takin January 11-a DSP Singh-a'n Hizbul Mujahideen firfiak pathum a phurh, Asif Ahmad, Naveed Babu leh Irfan Mir te an manna hmun, Qazigund khaw bula Jammu leh Srinagar highway leh a chheh vel chu uluk takin an dap nghal a ni.  

DSP Singh hi man a nih hnuah J&K police-te chuan a in an dap sak nghal a, AK-47 rifle, pistol pahnih, grenade pahnih leh pawisa nuai chuang an man a ni. January 16-a Ministry of Home Affairs (MHA)-in a ngen angin, National Investigation Agency (NIA) chuan Singh thubuai hi an chhui mek a ni. 

Suspend a nih hma hian Singh hi Srinagar Airport-a anti-hijacking unit-ah dah a ni bawk.